البوذيات الشعر

بجيت عيوني عالراحو وهدبي
واعرفه كليبي مايهده واهدبيه
الحسبته سلاح بالشده وهدبيه
هدو بيه عدواني عليه

عفت مكة وكَصدتك حاج اجيتك
ونه بكل الادلة حاججيتك
اريد اطلب طلب حاجة جيتك
اريد الروح وي روحك سوية



يهل تشتري اهموم الكلب **بيكم
عسه اموت ابحدث سيارة **بيكم
اشو غربلت يلصحبان **بيكم
بس غربال ضل يلعب بديه

*****
ما شايف مثل شكلك ولا ماس
انت اللا ذهب مثلك ولا ماس
انه المابيه نص طكه ولا مس
صرت مجنون من نظرك اليه

يظل غامض سؤالي وياك منحل
وكلبي معلك بكلبك ومنحل
لجلك صرت يابن الناس منحل
العسل للغير واللسعات اليه
***
حبيبي ماتجس نبظي شمالي
وبعد يمناي ماتوصل شمالي
انه الجنت العذيبي شمالي
صرت شرجي وعلى العالم اذيه
****
احبابي واعز من صحتي صحتهم
جفوني ولا ضمائرهم صحتهم
شوملت بيدي وبلساني صحتهم
سمعوا وشافوا ولا ردوا عليه